Familia González de las Riberas

Referencia

• ES.GA.15030.ARAG/2.69.

Título

• Familia González de las Riberas

Data de creación

• 1505-01-01 / 1951-12-31. 1505 a 1951

Nivel de descrición

• Fondo

Volume e soporte da unidade de descrición

• 17 Unidade(s) de instalación
• 62 Fotografía(s)

• González de las Riberas, familia ‌

Historia institucional/Reseña biográfica

• Manuel González de las Riberas (falecido en 1880), avogado, veciño de San Remixio de Liber (Becerreá, Lugo), casou con Florentina Vázquez Curiel (falecida en 1905), filla dos patrucios Francisco Vázquez Blanco e Vicenta Curiel Losada, veciños de Becerreá. Tivo por fillos a Arturo (falecido en 1938), Liberio, Amanda e Aurora González Vázquez. Manuel González descendía dunha familia de labradores acomodados de Liber, pero ademais dos bens familiares que tiña nesta parroquia, acrecentou a súa facenda comprando bens desamortizados. Así en 1844 mercou rendas forais do Convento de Penamaior (Santa María de San Lourenzo de Penamaior, Becerreá) e en 1847 unha partida de rendas do Priorato de Santa María a Real do Cebreiro. Valentín Vázquez Curiel, irmán de Florentina Vázquez Curiel, foi avogado nas Nogais, alcalde de Lugo e Deputado nas Cortes en varias lexislaturas desde 1853 ata 1873. Do seu pai herdou os vínculos e as casas das Nogais, Vilavexe (Santo André, As Nogais), Agüeira (San Xoán de Agüeir a, Becerreá) e Erbón (San Pedro de Tortes, Becerreá). Estes bens á morte de Valentín Vázquez en 1879 pasaron ao seu fillo Jesús Vázquez. Manuel González, primeiro, e logo Arturo González administraron estes bens para Jesús Vázquez ata que en 1899 Arturo González lle mercou a Jesús Vázquez parte desta herdanza, especialmente, bens do concello de Becerreá e entre eles a casa de Erbón.

Historia arquivística

• Descoñecida.

Alcance e contido

• Neste fondo temos por un lado documentación persoal da familia e polo outro documentación patrimonial, que constitúe a parte máis voluminosa do fondo. A documentación persoal redúcese a uns poucos documentos de diversa tipoloxía (cartas, fotografías, certificacións, impresos e recortes de prensa) de Manuel González de las Riberas e dos seus fillos e netos. Pódese destacar, polo seu volume, a correspondencia de Amparo González Roger, filla de Liberio González Vázquez, con diversas persoas. Na documentación patrimonial atopamos tres grupos. O primeiro contén os papeis da casa de Liber, na que se agrupan os xustificantes da propiedade e a documentación sobre a administración dos bens que Manuel González de las Riberas herdou, así como daqueles que mercou para acreentar as súas rendas. A maior parte da documentación deste grupo pertence aos séculos XVIII e XIX, e foi xerada por Manuel González e os seus antecesores. Resta un pequeno conxunto de papeis do século XX orixinados pola actividade de Arturo González Vázquez e os seus irmáns. Todo o material xira ao redor de bens localizados nos concellos de Becerreá e Cervantes. O segundo, reúne a documentación das casas das Nogais, de Vilavexe, de Agüeira e de Erbón, que conforman a herdanza de Valentín Vázquez Curiel. estes bens foron administrados por Manuel González de las Riberas e polo seu fillo, Arturo González Vázquez, ata que parte deles foron mercados polo propio Arturo González, ao herdeiro de Valentín Vázquez, o que xustifica a súa integración neste fondo. Neste caso é dentro dos séculos XVII, XVIII e XIX cando se produce maior parte dos papeis, de mans dos diferentes posuidores destas casas, pero tamén hai documentación dos séculos XVI e XX. Todo o material xira ao redor de bens localizados nos concellos de Becerreá e As Nogais. O terceiro, e último, ten papeis do Priorato de Santa María a Real do Cebreiro. Parte das rendas que pertenceron a este Priorato mercounas Manuel González de las Riberas cando foron desamortizadas. Cronoloxicamente a documentación dátase ente os séculos XVI e XX, se ben a maior parte pertence aos séculos XVIII e XIX. Aínda que os principais produtores deste material son os González de las Riberas, tamén hai papeis producidos polo propio Priorato e que deberon de pasar ás mans desta familia cando Manuel González mercou á Nación estas rendas. Todo o material xira ao redor de bens localizados no concello de Pedrafita do Cebreiro. Finalmente hai un pequeno conxunto de documentación xeral, que ou ben atinxe a todos estes grupos, ou ben non ten cabida neles. A documentación patrimonial repártese en moi diversas tipoloxías documentais que se distribúen nas distintas series do fondo. Se ben son os xustificantes da propiedade, que inclúen compravendas, arrendamentos, documentación testamentaria, inventarios e diversos contratos de cesión da propiedade, os que supoñen a parte máis abundante.

Condicións de acceso

Descrición condicións de acceso:

• Documentación de libre consulta, de acordo co art. 57 e 62 da Lei 16/1985 de 25 de xuño, do Patrimonio Histórico Español e o art. 82 da Lei 8/1995 do 30 de outubro, do Patrimonio Cultural de Galicia. Así como polo estipulado no art. 56 e 58 dos Estatutos da Real Academia Galega.

Existencia e localización de copias

• Existencia de copias: No existen copias