A Sección Feminina foi fundada no 1934 dentro da Falanxe Española e das XONS. Antes da Guerra Civil tivo a misión de atención a presos políticos e ás súas familias e de recadar fondos para facer propaganda e distribuíla por España. Como o resto de organizacións de Falanxe, é a partir do Decreto de unificación cando legalmente pasa a formar parte do aparato do Estado. Nos Estatutos de FET e das XONS de 1937 aparece xa configurada como Delegación Nacional.
No 1939 defínense a súa estrutura e funcións e adscríbeselle o servizo social da muller. En xeral, será competente en todo o relacionado coa formación e educación da muller. Organízase xerarquicamente mediante as figuras das delegadas e secretarias, nos eidos nacional, provincial e local. O Decreto 2485/1970, do 21 de agosto, define a estrutura en nove departamentos: Secretaría, Coordinación, Promoción, Participación, Formación e Participación da Xuventude, Departamento Económico Administrativo, Gabinete Técnico, Relacións Exteriores e Servizo Social, ademais das Xuventudes da Sección Feminina.
Os últimos grandes cambios veñen coa reorganización do Movemento no 1970. A Delegación Nacional queda encargada da formación, promoción e integración política e social da muller española (Decreto 15/1970, do 5 de xaneiro). As delegacións provinciais exercen esta mesma función no ámbito da súa competencia territorial (Decreto 2485/1970, do 21 de agosto).
A Sección Feminina, así como os demais órganos do Movemento Nacional, desaparece mediante o Decreto lei 23/77, do 1 de abril de 1977.
Entre as actividades máis destacadas están as cátedras ambulantes, os centros de formación e os grupos de coros e danzas, cun importante papel na recuperación do folclore tradicional.
Historia arquivística
A documentación chegou ao Arquivo do Reino de Galicia mediante unha transferencia irregular: tratouse máis ben dunha recuperación ante unha posible destrución. Nos anos 80 do século XX, (aproximadamente no 1989), ante o inminente traslado da sede da delegación, o persoal do ARG achegouse ata o edificio da praza de Pontevedra para recoller toda a documentación "almacenada" no depósito das caldeiras. Por suposto, sen ningún tipo de clasificación nin identificación ou relación. Así, o que nun principio parecía unicamente documentación da Fronte de Xuventudes, abrangue tamén documentos da Sección Feminina, do SEU, da delegación provincial do Ministerio de Cultura, e mesmo da Consellería.
Así, pódese afirmar que estamos ante nove fondos, herdeiros os últimos do primeiro. Serían:
- a documentación da Xefatura Comarcal do Movemento de Betanzos;
- a da Delegación Provincial de Xuventudes;
- a da Sección Feminina;
- a da Delegación Provincial de Asociacións / Familia;
- a Delegación Provincial do Ministerio de Información e Turismo;
- a Delegación Provincial do Ministerio de Educación e Ciencia;
- a Delegación / Dirección Provincial do Ministerio de Cultura;
- a Delegación Provincial da Consellería de Cultura;
- a Delegación Provincial da Consellería de Turismo, Xuventude e Deportes.
E un décimo fondo, a documentación da "Sociedad La Terraza" chegou mesturada con estes fondos, probablemente porque compartiran as mesmas instalacións.
Alcance e contido
O conxunto da documentación deste fondo custodiada no Arquivo abarca os anos 1957-1981; predomina a correspondente á década de 1960-1970.
Polo que respecta ás series, o maior número corresponde á Sección de Secretaría, pero as máis voluminosas corresponden á Sección de Promoción. Trátase de todos os xeitos de series moi curtas; as máis voluminosas son as de Expedientes de cátedras ambulantes e Expedientes de cursos. Destacan tamén a de Fichas de cursos e a de Fichas de persoal de cátedras.
Trátase, pois, dun fondo que ilustra a atención dedicada á muller polo Estado franquista.
Condicións de acceso
Condicións de acceso
Descrición condicións de acceso:
Acceso libre en xeral.
Condicións de reprodución
Condicións de reprodución:
A reprodución da documentación deste fondo está suxeita ás seguintes disposicións:
- Decreto 219/2011, do 17 de novembro, polo que se fixan os prezos públicos e as normas dos servizos de reprodución prestados nos arquivos xestionados pola Xunta de Galicia.
- Orde do 31 de agosto de 2010, pola que se establecen as normas para a consulta e reprodución dos documentos nos arquivos propios e xestionados pola Xunta de Galicia.
Lingua:
Spanish; Castilian
Escritura:
Mecanografiada
Características físicas
Estado de conservación:
Bo
Descrición do estado de conservación:
Trátase de documentación textual sobre papel, en bo estado de conservación. Tamén hai unha caixa con fotografías
Documentación relacionada
Existencia e localización de copias
Existencia de copias: Non existen copias
Unidades de descrición relacionadas
Unidades de descrición relacionadas: Hai unha parte da documentación xa descrita que conta cun inventario en papel e en fichas (Ficheiro 343). Pode considerarse como relacionada a documentación das institucións do Movemento Nacional: Xefatura Comarcal do Movemento de Betanzos, Delegación Provincial de Xuventudes e de Asociacións / Familia. Tamén é documentación complementaria a da Delegación Provincial do Ministerio de Información e Turismo, do Ministerio de Educación e Ciencia, do Ministerio de Cultura, da Consellería de Cultura e da Consellería de Turismo, Xuventude e Deportes. Atoparemos documentación complementaria nos arquivos históricos provinciais e no Arquivo Xeral da Administración de Alcalá de Henares.
Notas
Nota xeral
As unidades de instalación están compartidas con outros fondos.
Conta con instrumentos de traballo complementarios: estudos das series identificadas e base de datos de lexislación.
Xunta de Galicia. Información mantenida y publicada en internet por la Xunta de Galicia