O Ministerio de Cultura nace co Real decreto 1558/1977, do 4 de xullo, coa denominación de Ministerio de Cultura e Benestar, como resultado da confluencia de diferentes funcións doutros organismos: parte das unidades do Ministerio de Información e Turismo, a Subsecretaría de Familia, Xuventude e Deporte do Ministerio da Presidencia e a Dirección Xeral do Patrimonio Artístico e Cultural do Ministerio de Educación e Ciencia.
As delegacións regúlanse no Real decreto 2258/1977 do 27 de agosto, que tamén determina que de forma provisional e mentres non se configure a organización da Administración periférica do Estado, as funcións atribuídas ás delegacións provinciais de Cultura serán exercidas polas de Turismo, que actuarán como delegacións provinciais de Cultura e Turismo. Co Real decreto 392/1978 do 10 de febreiro, xorden as delegacións provinciais de Cultura como órganos da estrutura periférica do Ministerio de Cultura. Dependen organicamente da Subsecretaría do Ministerio.
A Orde do 13 de febreiro de 1978 desenvolve o Real decreto 392/1978 e divide as delegacións en catro categorías segundo as necesidades socioculturais da provincia: especial, primeira, segunda e terceira; a da Coruña é da primeira categoría.
No ano 1981 a estrutura periférica do Ministerio de Cultura sofre un cambio por ter que se adaptar á nova organización territorial resultado do proceso autonómico. Así o Real decreto 1081/1981, do 24 de xullo, recolle o cambio de denominación das delegacións provinciais ministeriais pola de “direccións provinciais”, integradas nos gobernos civís e dependentes tanto orgánica como funcionalmente de cadanseus ministerios. Faise necesario acomodar a estrutura periférica de cada ministerio. Co Real decreto 3321/1981, do 29 de decembro, a Delegación Provincial do Ministerio de Cultura pasa a denominarse Dirección Provincial de Cultura. Trátase unicamente dun cambio de denominación, xa que a organización e as funcións permanencen. Á fronte sitúase o Director Provincial e del dependen todos os órganos periféricos dos organismos autónomos do Ministerio de Cultura.
A partir de aquí, a paulatina diminución de atribucións e funcións segue un ritmo diferente nas distintas provincias, segundo as particularidades de cada proceso de transferencia.
En Galicia, as transferencias en materia de cultura fanse gradualmente mediante varias disposicións: Real decreto 1664/1980, do 31 de xullo; Real decreto 2434/1982, do 24 de xullo e Real decreto 3356/1983, do 28 de decembro. Como consecuencia, as direccións provinciais de Cultura perden a meirande parte das súas funcións.
Este proceso desemboca na reorganización da estrutura periférica do Ministerio e na supresión das direccións provinciais. O Real Decreto 1886/1984, do 4 de xullo, suprime as Direccións Provinciais da Coruña, Lugo, Ourense e Pontevedra e as Delegacións Locais de Santiago e Vigo. Xorde unha nova institución que asume as cada vez máis escasas competencias residuais que lle quedaran á Administración central en materia de cultura: a Xefatura de Servizos Periféricos do Ministerio de Cultura.
Como conclusión pódese dicir que a partir da Delegación Provincial de Cultura, unha institución dotada de amplas competencias e funcións no aspecto sociocultural, como consecuencia do proceso autonómico, xorden dous novos órganos:
- a Xefatura de Servizos Periféricos do Ministerio de Cultura, que desaparecerá finalmente;
- a Delegación Provincial da Consellaría de Cultura e Deportes da Xunta de Galicia.
A repartición de atribucións e funcións entre elas foi moi desigual, sendo a última a auténtica herdeira da Delegación Provincial do Ministerio de Cultura, pois queda coa meirande parte das súas competencias.
Historia arquivística
A documentación chegou ao arquivo mediante unha transferencia irregular: tratouse máis ben dunha recuperación ante unha posible destrución. Nos anos 80 do século XX —arredor do 1989—, ante o inminente traslado da sede da delegación, o persoal do ARG achegouse ata o edificio da Praza de Pontevedra e recolleu toda a documentación "almacenada" no depósito das caldeiras. Por suposto, encontrábase sen ningún tipo de clasificación, identificación nin relación. Así, o que nun principio parecía unicamente documentación da Fronte de Xuventudes, abrangue tamén documentos da Sección Feminina, do SEU, da Delegación Provincial do Ministerio de Cultura e mesmo da Consellería. Podemos afirmar que estamos ante nove fondos, herdeiros os últimos do primeiro:
- documentación da Xefatura Comarcal do Movemento de Betanzos,
- da Delegación Provincial de Xuventudes
- da Sección Feminina
- da Delegación Provincial de Asociacións/Familia
- da Delegación Provincial do Ministerio de Información e Turismo
- da Delegación Provincial do Ministerio de Educación e Ciencia
- da Delegación/Dirección Provincial do Ministerio de Cultura
- da Delegación Provincial da Consellaría de Cultura
- da Delegación Provincial da Consellaría de Turismo, Xuventude e Deportes
E un décimo fondo: a documentación da "Sociedade La Terraza" chegou mesturada con estes fondos, probablemente por compartiren nun tempo as mesmas instalacións.
Alcance e contido
O conxunto da documentación deste fondo que se custodia no Arquivo do Reino de Galicia abrangue os anos 1879-1987; predomina a correspondente ao período entre 1977 e 1984. A documentación de anos anteriores corresponde á función do Depósito Legal e Rexistro da Propiedade Intelectual. Polo que respecta ás series, o maior número corresponde ás seccións de Acción Cultural por unha banda e de Promoción Cultural no Negociado de Promoción e Manifestacións Artísticas, por outra. Con todo, trátase de series moi curtas; as máis voluminosas corresponden aos expedientes de Depósito Legal. Trátase, pois, dun fondo que ilustra a actividade cultural da provincia e a intervención da Administración nese eido.
Condicións de acceso
Condicións de acceso
Descrición condicións de acceso:
Acceso libre en xeral.
Condicións de reprodución
Condicións de reprodución:
A reprodución da documentación deste fondo está suxeita ás seguintes disposicións:
- Decreto 219/2011, do 17 de novembro, polo que se fixan os prezos públicos e as normas dos servizos de reprodución prestados nos arquivos xestionados pola Xunta de Galicia.
- Orde do 31 de agosto de 2010, pola que se establecen as normas para a consulta e reprodución dos documentos nos arquivos propios e xestionados pola Xunta de Galicia.
Dereitos de Autor
Situación de Dereitos de Autor:
Ó estar transferida a xestión do Arquivo á Comunidade Autónoma de Galicia, a reproducción de documentos está suxeita á Lei 13/1991, de 9 de decembro, de Taxas, prezos e exaccións, desenvolvida polo Decreto 320/1992, de 12 de decembro, polo que se fixan os prezos percibidos pola Xunta de Galicia, para os arquivos e museos xestionados pola Xunta ou de titularidade autonómica. Igualmente a publicación dunha reproducción debe ser autorizada, devengando o prezo público establecido no devandito Decreto ( artigo 5).
Lingua:
Spanish; Castilian
Escritura:
Mecanografada
Características físicas
Estado de conservación:
Bo
Descrición do estado de conservación:
Trátase de documentación textual sobre papel, en bo estado de conservación
Documentación relacionada
Existencia e localización de copias
Existencia de copias: Non existen copias
Unidades de descrición relacionadas
Unidades de descrición relacionadas: Hai unha parte da documentación xa descrita que conta cun Inventario en papel e en fichas (Libro 49 e Ficheiro 343). Pode considerarse relacionada con ela a documentación da Delegación Provincial do Ministerio de Información e Turismo, do Ministerio de Educación e Ciencia, da Consellaría de Cultura e da Consellar ía de Turismo, Xuventude e Deportes. Atoparemos documentación complementaria nos arquivos históricos provinciais e no Arquivo Xeral da Administración de Alcalá de Henares. Tamén é documentación complementaria a das institucións do Movemento Nacional: Delegación Provincial de Xuventudes, Sección Feminina e Asociacións/Familia
Notas
Nota xeral
As unidades de instalación están compartidas con outros fondos.
Conta con instrumentos de traballo complementarios: estudos das series identificadas e bases de datos de lexislación e de teleclubs.
Xunta de Galicia. Información mantenida y publicada en internet por la Xunta de Galicia