Os rexistros mercantís foron regulados inicialmente polo Código de Comercio de 1829, que constituíu a primeira norma de carácter xeral para os actos de comercio en España. Posuían un marcado carácter administrativo, pois esta norma establecía que debían levarse nas intendencias (máis tarde pasarían aos gobernos civís ou de provincia) e que estarían formados por uns "libros de matrícula general" e outros de "inscripción de los documentos que necesiten la toma de razón para que produzcan efectos legales". Por tanto, inicialmente o ámbito do establecido na Coruña estendíase a toda Galicia.
Este código estivo vixente, con diversas reformas, ata o promulgado no ano 1885, elaborado xa nun marco político, económico e institucional plenamente liberal. Nel, o rexistro mercantil inclúese no Título II do Libro I. Concíbese como un medio de publicidade que servirá de garantía para terceiros interesados en certos actos e operacións mercantís. A tal efecto, as oficinas de rexistro mercantil debían levar dous libros independentes: nun inscribiríanse os comerciantes particulares, e noutro, as sociedades. Nas provincias litorais, levaríase un rexistro de buques.
O Regulamento interino para a organización e réxime do Rexistro Mercantil do 21 de decembro de 1885 encomendou provisionalmente a institución aos rexistradores da propiedade e, no seu defecto, ao fiscal do xulgado municipal. Posteriormente, o artigo 3º do Regulamento do 20 de setembro de 1929 ratificou esta encomenda.
Historia arquivística
O fondo ingresa no Arquivo no ano 1958, por transferencia, probablemente xunto cos libros de contadorías de hipotecas da cidade da Coruña.
Alcance e contido
Comprende, entre outras, as seguintes series: libros de matrícula xeral de comerciantes de Galicia, libros índices de comerciantes, libros índices de buques, libros índices de sociedades mercantís, libros rexistro de escrituras de propietarios de buques ou compañías de comercio, libros índice de escrituras de sociedades mercantís.
Documentación relacionada
Existencia e localización de copias
Existencia de copias: No existen copias
Xunta de Galicia. Información mantenida y publicada en internet por la Xunta de Galicia