Casas de Bobadela e Guizamonde

Ligazón persistente

A casa de Bobadela estaba situada no lugar do mesmo nome, na parroquia de Santiago das Caldas (concello de Ourense). O pazo de Guizamonde consérvase actualmente na zona urbana da cidade de Ourense. O seu titular, Antonio Jacinto Sotelo de Novoa, deputado xeral do Reino de Galicia, casa con María Carmen Enríquez Niño de la Vega, co cal une o seu patrimonio ao da casa de Casteadona. O seu fillo, Benito María Sotelo de Novoa é o primeiro marqués de Villaverde de Limia e rexedor da cidade de Ourense, e a súa neta, Casilda Sotelo de Novoa Herce e Aguilera, segunda marquesa de Villaverde de Limia, une estes dous patrimonios ao bloque de Bóveda ao casar con Antonio Joaquín Ulloa de las Riberas. Varios membros desta familia desempeñaron cargos na cidade de Ourense. A principios do século XIX, a casa de Villafranca del Bierzo, e con ela o vínculo dos Cámara de Salas de Bureba (Burgos), incorpórase a Guizamonde ao falecemento de Francisco de Paula Armesto Cámara e Quintano sen fillos, que testa en favor de Benito María Sotelo de Novoa.