Encomenda pertencente á Orde de Alcántara, implantada en Galicia desde o século XIII. O núcleo da encomenda situábase na parroquia de Velle, no actual concello de Ourense. Coñecida tamén como “Encomenda da Batundeira e Xuro de Badaxoz”, estaba formada polos coutos de Troncoso-Couxil e o da Batundeira. Os bens desta encomenda estendíanse polos concellos de Ourense, Allariz, Maside, Ribadavia, Chantada, Castrelo de Miño, A Gudiña, etc. A encomenda da Batundeira mantívose ata finais da Idade Moderna.
Historia archivística
Este fondo ingresou no arquivo procedente da Delegación de Facenda en 1943. Forma parte dos documentos fundacionais do Arquivo Histórico Provincial de Ourense e procede das institucións relixiosas desamortizadas no século XIX. Trala Desamortización os arquivos das institucións relixiosas ingresaron no Arquivo Histórico Nacional pero unha boa parte dos fondos monásticos ourensáns permaneceu nas dependencias provinciais de Facenda e pasou a constituír a documentación fundacional do arquivo.
Xunta de Galicia. Información mantenida y publicada en internet por la Xunta de Galicia