O xulgado privativo de Correos e Camiños adquiriu na segunda metade do século XVIII un gran desenvolvemento, xa que resolvía todas as incidencias do persoal e dos servizos destes ramos.
Desde 1761, o superintendente administrador xeral da Renda de Correos depende da Secretaría de Despacho de Estado. Terá a facultade para nomear subdelegados nos distintos camiños; estes cargos recaerán sempre nos capitáns xenerais, comandantes xenerais ou intendentes das cidades a onde se dirixía cada dun dos camiños radiais que, con centro en Madrid, se ordenaron construír daquela. En Galicia, unhas veces ocupará o posto de subdelegado de Correos e Camiños o capitán xeneral; outras, o intendente. Tiña competencias sobre a reparación de camiños antigos e apertura doutros novos, así como funcións xurisdicionais en relación con estas materias. As súas sentenzas eran apelables perante o Consello de Facenda.
Con Carlos III melloraron as comunicacións e perfeccionáronse os correos, tanto marítimos como terrestres. En 1768, sendo capitán xeneral de Galicia e presidente da Real Audiencia o conde de Croix, rematáronse os dous camiños reais, o de Castela e o de Compostela.
Polo que respecta aos correos marítimos, xa desde 1689 funcionaba un servizo regular entre Falmouth e A Coruña a cargo de buques británicos.
En 1764, por orde do Rei, concedéuselle á Coruña o servizo de correos coas Indias. En 1768 cedíaselle ao armador José Antonio López a península dos Xudeus e terreos na Palloza como arsenal e porto para eles.
Mediante Real decreto do 20 de decembro de 1776 créase a Real Xunta e Superintendencia Xeral de Correos e Postas, con coñecemento privativo nas apelacións das sentenzas dadas polos subdelegados. O superintendente de Correos e Postas é á vez o primeiro secretario de Estado. Os seus subdelegados entenderán en todas as causas en primeira instancia. O persoal da Renda de Correos gozará do seu propio foro. En 1778 agrégase a Superintendencia Xeral de Camiños á de Correos e Postas.
Carlos IV aproba mediante Real cédula do 8 de xuño de 1794 a Ordenanza xeral de Correos na que establece que o primeiro secretario de Estado e de Despacho siga sendo o superintendente xeral nato da Renda de Correos e Postas de España e Indias, e dos correos marítimos e os seus arsenais, de camiños e pousadas, dos bens mostrencos, vacantes e abintestatos, e da Real Imprenta.
No inventario de 1828 dos documentos existentes nas casas de Domingo Valado de Parga e Patricio Vermúdez de Castro aparecen perfectamente identificadas as dúas escribanías encargadas dos negocios do xulgado: a de Camiños e a de Correos.
O Xulgado de Correos e Camiños foi suprimido por Real orde do 17 de outubro de 1842. A súa xurisdición pasa aos xulgados de instrución e primeira instancia que acababan de crearse.
Historia arquivística
A documentación da Subdelegación de Correos e Camiños, que en 1828 dependía do capitán xeneral de Galicia, conservábase, como a de outros escribáns, nas súas casas. En 1827 Domingo Valado de Parga, escribán de millóns na Intendencia Xeral das Xuntas e Deputacións, solicita ao capitán xeneral, como Subdelegado de Correos e Camiños de Galicia, que ordene a recollida e traslado desa documentación xerada polos seus antecesores (Barizo, Cayo Acha, Manuel Acha e Patricio Bermúdez de Castro) a outro lugar para que queden libres as estancias da súa escribanía.
O capitán xeneral ordena que se recolla e inventarie toda a documentación e que se instale nunha peza do palacio onde reside o gobernador, concretamente na dedicada aos porteiros e avogados do tribunal. En 1828, o arquiveiro do Real Arquivo, Victorio Suárez Roel, entrega as chaves da peza elixida.
No inventario da documentación recollida na que fora a casa de Patricio Vermúdez de Castro, o seu herdeiro, José María Taboada, certifica que gardou toda a documentación baixo chave no terceiro andar do edificio, polo que non se produciu perda ningunha. A documentación recollida foi instalada na peza indicada polo capitán xeneral: a procedente da casa de Valado o 29 de abril de 1828 e a procedente da casa de Taboada o 10 de outubro do mesmo ano.
Alcance e contido
Comprende expedientes relacionados coa composición e reparación de camiños e pontes, poxa e arrendamento de postas, transporte, naufraxios, corsos, pescuda de bens mostrencos, etc.
Condicións de acceso
Condicións de acceso
Descrición condicións de acceso:
Acceso libre en xeral.
Condicións de reprodución
Condicións de reprodución:
A reprodución da documentación deste fondo está suxeita ás seguintes disposicións:
- Decreto 219/2011, do 17 de novembro, polo que se fixan os prezos públicos e as normas dos servizos de reprodución prestados nos arquivos xestionados pola Xunta de Galicia.
- Orde do 31 de agosto de 2010, pola que se establecen as normas para a consulta e reprodución dos documentos nos arquivos propios e xestionados pola Xunta de Galicia.
Lingua:
Spanish; Castilian
Características físicas
Estado de conservación:
Bo
Documentación relacionada
Existencia e localización de copias
Existencia de copias: Non existen copias
Unidades de descrición relacionadas
Unidades de descrición relacionadas: - Colección documental César Vaamonde Lores- Real Audiencia de Galicia- Arquivo do Reino de Galicia, historia do arquivo
Notas
Nota xeral
Nota ao volume: 726 caixas son só do Catastro do Marqués de la Ensenada
Xunta de Galicia. Información mantenida y publicada en internet por la Xunta de Galicia