Fotografías

Referencia

• ES.GA.15030.ARG/2.1.2.19.2.1.

Título

• Fotografías

Data de creación

• 1900 / 1930 (comprendido entre)

Data de acumulación

• 1900 / 1930

Nivel de descrición

• Colección

Volume e soporte da unidade de descrición

• 880 Fotografía(s)
• Predominan 107 x 45 mm (aproximadamente)

Outras características físicas:

• Positivos e negativos estereoscópicos sobre cristal, B/N

• Pedrosa Pérez Dávila, familia ‌

Historia institucional/Reseña biográfica

• Os documentos que integran o fondo permiten reconstruír a historia da familia ata comezos do século XVIII. Identifícanse dous núcleos principais: 1. Núcleo da familia Pedrosa. Enlaza coas familias Miranda e Armada, nas que se conserva o título do condado da Torre Penela. 2. Núcleo da familia Pérez Dávila. Enlaza coa familia Casares Gil, notable saga de científicos composteláns, na que destacaron Antonio Casares Rodríguez, José Casares Gil e Antonio Casares Gil. As liñas de desenvolvemento do parentesco son as seguintes: 1. Núcleo Pedrosa: 1.1. Familia Miranda-Armada (Casa de Vilanova de Arroxo e outras): José María Puga Miranda, conde da Torre Penela casou con Mercedes Armada Guerra. Sen descendencia. Deixan como herdeira a Ramona Luisa Armada. Esta casou con José Miranda. Terán unha filla: Carmen Miranda Armada. 1.2. Familia Pedrosa Miranda. Carmen Miranda Armada casa con Jacobo Pedrosa Ulloa. Teñen varios fillos, entre eles, Juan Pedrosa Miranda. 2. Núcleo Pérez-Dávila: 2.1. Familia Casares: José Casares Becerra casa con Teodora Rodríguez. Teñen un fillo: Antonio Casares Rodríguez (1812-1888). 2.1. Familia Casares Gil. Antonio Casares Rodríguez casa con Jesusa Gil. Teñen varios fillos, entre eles, Concepción Casares Gil e José Casares Gil (1866-1961). 2.2. Familia Pérez-Dávila: Juan José Pérez-Dávila casa con Carmen González Ron Figueroa. Teñen varios fillos, entre eles, Fermín Pérez-Dávila González e Ramón Pérez-Dávila González. 3. Núcleo Pedrosa Pérez-Dávila: 3.1. Familia Pérez-Dávila Casares: Fermin Pérez-Dávila casa con Concepción Casares Gil. Teñen dúas fillas: María e Carmen Pérez-Dávila Casares. En segundas nupcias, Concepción casa co seu cuñado, Ramón Pérez-Dávila. 3.2. Familia Pedrosa Pérez-Dávila. Carmen Pérez-Dávila Casares casa con Juan Pedrosa Miranda. Teñen dúas fillas: Carmen Pedrosa Pérez-Dávila e Concepción Pedrosa Pérez-Dávila, a doadora dunha parte dos documentos.

Historia arquivística

• Os documentos que constitúen este fondo permaneceron en poder da familia ata o momento do ingreso no Arquivo. Recibíronse en dous momentos e por dúas vías diferentes. En primeiro lugar, adquiriuse por compra un conxunto de 880 fotografías familiares. Dous anos despois ingresaron por doazón dúas unidades de instalación que contiñan documentos de carácter textual.

Alcance e contido

• Os documentos semellan ser nunha elevada proporción obra dun só fotógrafo, non profesional. Un afeccionado bastante entendido na arte da fotografía e interesado en explorar as posibilidades que esta lle achega para representar o seu entorno e os temas que lle son queridos, na súa casa e nos desprazamentos que realiza. Algunhas fotografías aboan esta hipótese: retratos repetidos de membros dun grupo familiar (incluso criados), non só en actitude de pose senón en medio da vida cotía, de traballo ou lecer; paisaxes aldeás (casares e espazos circundantes), paisaxes de cumes montañosos (bastante abondosos), paisaxes mariñas, paisaxes urbanas, interior de monumentos.... Neles é posible apreciar unha forma de compoñer característica, formalmente correcta (especialmente nas paisaxes, nas que se marcan con precisión a sucesión de planos para transmitir con claridade a idea de profundidade), que se repite na maior parte das fotografías, e un afán por achegar, no retrato, o maior grao posible de significación á imaxe (e así se dispón ao artesán, en pé, cos instrumentos propios do seu oficio; ao cazador coa escopeta, o can e a peza; á moza, coa sella na cabeza). Todos no mesmo escenario neutro que ofrece unha parede branca. En moitas imaxes anótase ademais un número de identificación e, ás veces, a data: 1906, 1907, 1909... Noutras, o fotógrafo anotou o lugar (Rebón, Covelos, El Piñeiro, Limia..., en Galicia); Avilés, Salinas, Barcelona, Madrid, Fuenterrebía, Stockholm, Krúkiania-Malvö, un fiordo; Berlín...). En numerosas ocasións, o fotógrafo anota tamén o que parecen ser os produtos e os tempos empregados no proceso técnico. Podemos identificar varios conxuntos temáticos: 1. Imaxes orixinais tomadas en diversos lugares de Europa a principios do século XX (Italia, Suecia, Alemaña...). 2. Imaxes orixinais de diversos lugares de España (Barcelona, Avilés, Madrid...). Normalmente, son paisaxes urbanas ou naturais. 3. Imaxes tomadas en Galicia: paisaxes rurais e urbanas e retratos. Entre elas áchanse documentos que amosan a realidade cotiá da vida pacega: escenas de trabalo no campo (recollida da herba seca); escenas de interiores (cociña); retratos. 4. Monumentos, identificados polo fotógrafo: "Catedral de Oviedo, Altar Mayor", ou identificables (Mezquita de Córdoba). Existen ademais outros subgrupos de imaxes de diferente carácter. Por exemplo, retratos de estudo de membros da familia en formatos maiores, e diapositivas editadas con vistas de monumentos e lugares de diversos países de Europa. O exame dos documentos textuais que integran o fondo suxire que o autor destas fotografías puido ser un dos fillos de Antonio Casares Rodríguez, ben Antonio Casares Gil (Santiago de Compostela, 1871-A Coruña, 1921) ou José Casares Gil (Santiago de compostela 1866-1961), científicos destacados do seu tempo, como antes o fóra seu pai. Ambos os dous ampliaron estudos en Alemaña e noutros países europeos. Antonio, botánico, "está recoñecido como o primeiro briólogo peninsular e creador da moderna Bioloxía ibérica" (Bellot). José, químico, destacou polas súas achegas na análise de augas, especialmente para descubrir a presenza de flúor ou de bromo nas augas medicinais. Foi un incansable viaxeiro que visitou diversos países de Europa e América.