López Cuevillas, Florentino

Ligazón persistente

Florentino López Alonso-Cuevillas (Ourense, 1886-1958). Realizou os seus primeiros estudos na súa cidade natal, para despois marchar a Santiago de Compostela, onde se licenciou en Farmacia. Posteriormente realizou estudos parciais de Filosofía e Letras en Madrid. Desenvolveu toda a súa vida laboral en Ourense como funcionario; primeiro no Ministerio da Gobernación e despois na delgación ourensá do Ministerio da Facenda Pública. Estivo intelectualmente vencellado ao cenáculo ourensán, integrado tamén por Otero Pedrayo e Vicente Risco. Colaborou na revista neosófica La Centuria. Formou parte das Irmandades da Fala, cara 1918, asumindo un galeguismo militante. Participaría no nacemento da revista Nós en 1920, onde publicou moitos dos seus traballos. Foi tamén membro do Seminario de Estudos Galegos, creado un ano antes. Nel dirixiu a sección de Prehistoria, ata que a Guerra Civil paralizou a actividade da institución. Foi un gran especilista no estudo da cultura castrexa a través dos seus restos arqueolóxicos. As súas investigacións, fornecidas nun amplo coñecemento da tradición e da vangarda arqueolóxica europea, traducíronse en importantes achegas científicas; como, por exemplo, o apartado da “Prehistoria” da Historia de Galiza (1973), dirixida por Otero Pedrayo. Ademais cultivou a prosa e o ensaio literario. Cuevillas faleceu en Ourense en 1958, dous anos despois da súa xubilación. É considerado o pai dos estudos prehistóricos de Galicia.