A instauración dos tribunais industriais iníciase coa implantación da xurisdición laboral en 1908 mediante a Lei do 19 de maio pola que se establece un tribunal industrial en cada partido xudicial a petición de obreiros e patróns. Estes órganos dirimían os conflitos individuais mentres que os colectivos eran vistos polos consellos de conciliación creados o mesmo ano. Con todo, parece que a súa constitución non foi efectiva, polo que se ditou a Lei do 22 de xullo de 1912, que tenta de novo poñelos en funcionamento.
O tribunal componse dun xuíz de primeira instancia como presidente, de dous xurados e un suplente, patróns, e dous xurados e un suplente, obreiros. As funcións e atribucións propias que entendían eran as reclamacións civís que puidesen presentarse entre patróns e obreiros sobre incumprimento ou rescisión de contratos de servizos, de traballo ou de aprendizaxe. Así mesmo coñecía os procesos derivados dos accidentes de traballo. En 1926 mediante o Código do Traballo engádense as reclamacións por incumprimento das leis e disposicións de carácter social que afecten ao demandante e que non teñan sinalado procedemento especial, gubernativo ou xudicial. En xeral, as cuestións de competencia dirimíanse ante o xuíz de primeira instancia.
Mediante a Lei do 22 de xullo de 1912 as sentenzas do Tribunal Industrial podían apelarse ante a Sala do Civil da Audiencia Territorial. Establecíase a posibilidade de exercer recurso de casación, ante a Sala do Civil do Tribunal Supremo, cando existía infracción de lei ou quebrantamento de forma.
O Real Decreto do 12 de agosto de 1912 establece que continuarán funcionando os tribunais instaurados en 1908 pero con segundo as normas procesuais da nova lei de 1912, alí onde se achen organizados e procederase á constitución de novos tribunais.
O Código do Traballo de 1926 considera creados os tribunais industriais nas capitais de provincia e cabezas de partido que se citan no anexo (Lugo e Monforte de Lemos). O Goberno podería decretar o establecemento dun Tribunal Industrial na cabeza dun partido xudicial que carecese del, sempre que o estime oportuno, por iniciativa propia ou a petición de obreiros e patróns. Así mesmo, designaba especialmente un funcionario xudicial para presidir o Tribunal, desempeñando o cargo o xuíz de primeira instancia do partido mentres non se constituíse.
As funcións auxiliares eran desempeñadas por un secretario xudicial designado pola Sala de Goberno da Audiencia Territorial e os subalternos podían ser os mesmos do Xulgado de Primeira Instancia ou os que, no seu caso, nomeásense para o Tribunal que se creaba.
Co Real Decreto-Lei do 26 de novembro de 1926, que establece a Organización Corporativa Nacional, aparece a dualidade xurisdicional no ámbito laboral. Este decreto establece as atribucións dos comités paritarios e das comisións mixtas de traballo, que resolvían os conflitos industriais. En 1931 mediante a Lei do 27 de novembro estes comités paritarios acomodan o seu funcionamento aos recentemente creados xurados mixtos do traballo industrial e rural, encargados de exercer funcións de conciliación e arbitraxe.
Por tanto, nesta época existirá por unha banda, un órgano propiamente xudicial, o Tribunal Industrial, e doutra banda, o Comité Paritario e a partir de 1931 o Xurado Mixto como un organismo vinculado administrativa e xerarquicamente ao Ministerio de Traballo.
A Lei de bases do 16 de xullo de 1935 de modificación do réxime dos Xurados Mixtos, suprime os tribunais industriais, pero son restablecidos pola Lei do 30 de maio de 1936. A supresión definitiva destes tribunais prodúcese mediante dúas disposicións: o Foro do Traballo de 1938, que crea as maxistraturas de traballo, mentres que o Decreto do 13 de maio de 1938 incide na xurisdición laboral e suprime os xurados mixtos e tribunais industriais traspasando as competencias destes organismos ás recentemente creadas maxistraturas de traballo. A organización definitiva destes organismos prodúcese mediante a Lei Orgánica da Maxistratura de Traballo do 17 de outubro de 1940 que fixa a provincia como a súa xurisdición territorial.
Historia archivística
Os documentos xerados polo Tribunal Industrial de Quiroga atopábanse almacenados nunhas dependencias municipais do Concello de Monforte de Lemos, presentando unhas condicións bastante inapropiadas debido á existencia de filtracións de auga e rotura de cristais. Foran depositados alí debido á escasa capacidade do arquivo do Xulgado de Primeira Instancia e Instrución nº 1 de Monforte de Lemos, organismo encargado da súa custodia.
A documentación do fondo estaba mesturada cos expedientes xerados polos xulgados de primeira instancia e instrución de Quiroga e o nº 1 de Monforte de Lemos, os xulgados municipais de Monforte de Lemos e Quiroga, os xulgados comarcais de Sober, Quiroga e O Saviñao, e os tribunais de Foros de Monforte de Lemos e Quiroga.
Alcance e conteúdo
O fondo abarca un curto pero significativo período temporal (1935-1936). Predominan os preitos orixinados por incumprimentos ou rescisións de contrato e por accidentes de traballo.
Esta documentación xudicial é unha importante fonte de información na investigación do movemento obreiro ao permitir trazar a conflitividade laboral e social orixinada no partido xudicial de Quiroga.
Condiciones de acceso
Condiciones de acceso
Descripción condiciones de acceso:
A documentación é de acceso libre, segundo o artigo 57 da Lei 16/1985 de Patrimonio Histórico Español (supera o límite de 50 anos desde a data do documento que determina a lexislación para a súa consulta pública) e o artigo 23 da Lei 7/2014 de arquivos e documentos de Galicia.
Condiciones de reproducción
Condiciones de reproducción:
Os prezos están suxeitos ao Decreto 219/2011, do 17 de novembro, polo que se fixan os prezos públicos e as normas dos servizos de reprodución prestados nos arquivos xestionados pola Xunta de Galicia.
A prestación do servizo quedará condicionada ao estado de conservación dos fondos.
Lengua:
Spanish; Castilian
Documentación relacionada
Unidades de descripción relacionadas
Unidades de descripción relacionadas: Consérvase no mesmo Arquivo Histórico Provincial de Lugo o fondo da Maxistratura de Traballo como organismo sucesor das súas funcións. No fondo da Audiencia Territorial de Galicia custodiado no Arquivo do Reino de Galicia poderían consultarse as apelacións que se sustanciaban na Sala do Civil.
Xunta de Galicia. Información mantenida y publicada en internet por la Xunta de Galicia