Galicia constituíuse como Comunidade autónoma mediante unha lei básica, o Estatuto de autonomía, aprobado en 1981. O Estatuto de Autonomía de Galicia establece, no seu artigo 9º, que os poderes da Comunidade Autónoma se exercen a través da Xunta e do seu Presidente, ademais de polo Parlamento.
O Parlamento é elixido por un período de catro anos a través dun sistema de representación proporcional que toma como circunscrición electoral a provincia. Entre as súas funcións está o exercicio da potestade lexislativa da Comunidade autónoma, o control da acción executiva da Xunta, a aprobación dos seus orzamentos, a designación para cada lexislatura das Cortes Xerais dos senadores representantes da Comunidade autónoma galega, e a elección de entre os seus membros do presidente da Xunta de Galicia. Será o presidente quen designe aos restantes membros da Xunta.
En 1983 publícase a lei 1/1983, de 22 de febreiro, de normas reguladoras da Xunta e da súa presidencia, que será modificada parcialmente pola Lei 11/1988 do 20 de outubro. No seu artigo primeiro, establece que a Xunta é o órgano colexiado de Goberno de Galicia. Dirixe a política e a Administración da Comunidade Autónoma e exerce a función executiva e a potestade regulamentaria de acordo co Estatuto de Autonomía e as leis. No artigo segundo, sinala que está composta polo Presidente , vicepresidente ou, de ser o caso, vicepresidentes e os conselleiros. No ano 1982, publícase o Regulamento de Réxime Interior da Xunta de Galicia (Decreto 76/1982 de 21 de Abril). Del volverán ocuparse os decretos 111/1984 de 25 de maio, polo que se aproba o Regulamento de réxime interior da Xunta de Galicia, e 57/1994 de 25 de marzo, de modificación do Regulamento 111/1984 de réxime interior da Xunta de Galicia.
Baseándose no establecido na Constitución española e mediante sucesivos procesos de transferencias, a Comunidade autónoma irá asumindo unha ampla gama de competencias que exercerá de forma exclusiva ou compartida. Creará para iso unha estrutura administrativa que irá evolucionando marcada polo ritmo, tanto do proceso de transferencias , como dos cambios políticos.
Podemos agrupar estas competencias nas seguintes áreas de actuación, que constitúen as seccións funcionais en que se divide o fondo documental da Xunta de Galicia:
- ALTA DIRECCIÓN DA COMUNIDADE AUTÓNOMA
- ADMINISTACIÓNS PÚBLICAS
- ECONOMÍA E FACENDA
- COMERCIO E CONSUMO
- CULTURA
- DEPORTE
- EDUCACIÓN E INVESTIGACIÓN
- INDUSTRIA
- MEDIO AMBIENTE
- MEDIO RURAL
- PESCA
- POLÍTICA LINGÜÍSTICA
- POLÍTICA TERRITORIAL
- SANIDADE
- SEGURIDADE E INTERIOR
- SERVIZOS SOCIAIS
- TRABALLO
- TURISMO
Historia arquivística
O Arquivo de Galicia custodia os documentos producidos pola Xunta de Galicia e os órganos e entidades dela dependentes desde a súa creación (1982), así como outros de calquera procedencia que, polo seu ámbito e interese, se lle poidan asignar. Entre as súas funcións están: 1. Recibir os documentos procedentes dos diferentes órganos da Xunta de Galicia ou das entidades públicas dependentes dela cun ámbito territorial superior a unha provincia. 2. Recibir os documentos procedentes de organismos, institucións e entidades públicas de ámbito autonómico dependentes da Xunta de Galicia que fosen suprimidos, con independencia da súa antigüidade.