Este partido recolle as rendas da Casa e Torre de Miraflores (San Xenxo de Padriñán, Sanxenxo).
A historia desta casa comeza coa fundación vincular feita polo matrimonio formado por Simón Díaz de Saavedra e Margarita Suárez polo seu testamento do 26 de setembro de 1603. Nela, ademais, unen ao vínculo da Casa de Miraflores a capelanía de Nosa Señora da Purificación da igrexa paroquial de San Xenxo de Padriñán (Sanxenxo) que fundan neste mesmo testamento. Desde entón os sucesores da casa serán tamén patróns da capela. Nomearon como herdeiro ao seu fillo, Diego Suárez de Saavedra, reitor de San Estevo de Morás (Arteixo) ao que sucederá no vínculo o neto dos fundadores, Esteban Suárez de Saavedra e despois de este o seu irmán Antonio Suárez de Saavedra (morto en 1654). Os dous irmáns deixaron sendas agregacións ao vínculo polos seus testamentos.
O seguinte posuidor será Margarita Suárez de Saavedra, sobriña dos anteriores, que, casada con Domingo Pose de Faxín, deixou como herdeira á súa filla Andrea María Pose de Saavedra. Andrea casou con Carlos José Sarmiento, co que tivo a Jácome Sarmiento de Valladares (morto en 1766), María Margarita Sarmiento (morta en 1771), Monxa en Pontevedra, no convento de Santa Clara, e Francisca Teresa Sarmiento (morta en 1773), Monxa en Baiona, os tres últimos posuidores do vínculo en liña directa dos fundadores. Á morte de Francisca Teresa iníciase un preito entre José Antonio Taboada e Vicente de Lemos, por unha parte, e, pola outra, Antonio Pardo Patiño (morto en 1813), representado no comezo do preito polo seu pai, Pedro Pardo Patiño Montejano (1722-1804). O preito remata en 1792, ano no que Antonio Pardo toma a posesión xudicial dos bens do vínculo.
Antonio casou con Benita Bazán de Mendoza, pero ao non deixar fillos, os bens do petrucio pasaron ao seu sobriño, Miguel Pardo Bazán (1784-1839). De Miguel, casado con Joaquina Mosquera, a casa pasou ao seu fillo José Pardo Bazán (1827-1890). Do matrimonio de José Pardo Bazán e Amalia de la Rúa (1830-1915) quedou como única filla e herdeira universal dos seus bens Emilia Pardo Bazán (1851-1921). Á morte desta quedou coa casa a súa filla Blanca Quiroga Pardo Bazán que casou co militar José Cavalcanti (1871-1937 ). Blanca vendeu a casa e,a lo menos, parte das súas rendas a Rafaela Osorio de Moscoso, Duquesa de Terranova, por escritura do 6 de novembro de 1940.
Historia arquivística
A documentación procede do arquivo patrimonial da familia Pardo Bazán que conservou a última descendente Blanca Quiroga (hoxe tamén custodiado pola Real Academia Galega) e que debeu de pasar as mans dos compradores da Casa de Miraflores en 1940.
Parte da documentación conserva marcas dos antigos arquiveiros que organizaron os papeis da familia, en concreto, teñen unha cuberta coa referencia ao mazo e ao "legajo" ao que pertencían así como unha descrición do seu contido que debeu de estar anotada nun libro índice (conservado no fondo da familia Pardo Bazán na sección "Partido de Miraflores").
Na área de notas da descrición das unidades de instalación e dos documentos sinálase sempre este número de mazo, "legajo" e documento que forman a signatura antiga, no caso dos papeis que a manteñan.
Alcance e contido
A maior parte da documentación pertence ao século XIX, repartíndose o resto entre os séculos XVI, XVII, XVIII e XX. Nos séculos XVI-XVIII concéntranse as escrituras antigas sobre adquisición de bens, correspondéndolle aos periodos do XIX e XX a documentación de carácter administrativo, especialmente prorrateos e relacións de rendas.
Todo o material xira ao redor de bens localizados nos concellos de Meaño, O Grove e Sanxenxo.
Condicións de acceso
Condicións de acceso
Descrición condicións de acceso:
Documentación de libre consulta, de acordo co art. 57 e 62 da Lei 16/1985 d e 25 de xuño, do Patrimonio Histórico Español e o art. 82 da Lei 8/1995 do 30 de outubro, do Patrimonio Cultural de Galicia. Así como polo estipulado no art. 56 e 58 dos Estatutos da Real Academia Galega.
Documentación relacionada
Existencia e localización de copias
Existencia de copias: No existen copias
Unidades de descrición relacionadas
Unidades de descrición relacionadas: No fondo Familia Pardo Bazán do Arquivo da RAG, na sección de patrimonio consérvanse parte dos papeis do Partido de Miraflores de onde procede esta documentación.
Notas
Nota xeral
Historia Institucional: completada coa documentación do "Partido de Meirás" que pertence ao fondo deste arquivo, Familia Pardo Bazán.
Historia da custodia: pódese completar a información consultando a descrición do "Partido de Meirás" que pertence ao fondo deste arquivo, Familia Pardo Bazán.
Xunta de Galicia. Información mantenida y publicada en internet por la Xunta de Galicia