Nacido en Astorga en 1846, cursou a carreira de Diplomática na Escola Superior de Oviedo e na de Madrid. Membro do corpo de Archiveros, Bibliotecarios e Anticuarios, desenvolveu dende 1865 a súa tarefa profesional no Arquivo do Ministerio da Gobernación e, a partir de 1872, no General de Galicia na Coruña. Ademais de arquiveiro foi historiador, lingüista e editor de obras en galego e sobre Galicia. Os seus estudos e publicacións sobre a historia da cidade fixérono merecedor do título de Cronista Oficial da Coruña en 1889. Formou parte de institucións como a Sociedad Económica de Amigos del País e de reais academias como a Galega, a de Belas Artes, a da Historia e a da Lingua Española. O seu traballo como investigador está reflectido en máis de cen estudos publicados en prensa, revistas e nas súas numerosas monografías. Entre estas últimas destacan: " Documentos gallegos del Archivo Municipal de La Coruña, Algunos temas gallegos, El cerco de La Coruña en 1589 y Mayor Fernández Pita, Crónica Troyana, Los nombres de La Coruña, De la guerra de Independencia en Galicia, Documentos gallegos de los siglos XIII al XVI " e outros. Como editor subliñar o seu labor, xunto a Fernández Latorre, na Biblioteca Galega (1885), onde publicou as obras de autores galegos do momento; traballos que tamén difundiu na "Revista Galicia. Revista Regional", fundada en 1887.
Historia arquivística
Os documentos que proceden, na súa maioría, de mosteiros e congregacións desamortizadas deberon de ser adquiridos por Andrés Martinez Salazar para as súas investigacións. Á súa morte, permaneceron en poder da súa viúva ata que foron vendidos ao Concello polos seus herdeiros. Dende a súa incorporación ao Arquivo clasificáronse baixo o epígrafe Documentación Martinez Salazar. A arquiveira Isabel Martínez- Barbeito relacionou, en xuño de 1984, o contido das catro carpetas, indicando na número 4: "Documentos achados entre os de Martínez Salazar que non figuran na relación". Igualmente, deixou constancia da desaparición, con anterioridade ao 8 de xuño de 1960, do privilexio do rei Ramiro e os Votos de Santiago coa confirmación do Papa Celestino, 1567.
Alcance e contido
Trátase dunha colección de documentos dende o século XI ao XIX, a maioría deles pertencentes a mosteiros galegos. En xeral, son escrituras de foro, venda, compra, doazón, compromiso, permuta e préstamo, acompañadas dalgún libro rexistro de escrituras (doazóns, vendas, foros...), de gastos, e de inventarios e catálogos de documentos. A parte máis destacada corresponde aos mosteiros de Santa María de Monfero e Sobrado (San Andrés de Roade, Almerezo, Priorado da Cabana), aínda que tamén se achan de Caaveiro, Toxosoutos, San Payo de Antealtares, Oseira, Santa Catalina de Montefaro, Orde Terceira de Betanzos e Santo Domingo da Coruña. Así mesmo, o conxunto inclúe un memorial imprimido da cidade da Coruña e unha escritura de compra-venda entre particulares de Pontevedra de 1443.
Condicións de acceso
Condicións de acceso
Descrición condicións de acceso:
Consulta libre, só limitada polo estado de conservación da documentación.
Condicións de reprodución
Condicións de reprodución:
Suxeito ás taxas e prezos públicos que para reprodución de documentos fixase o Concello.
(Ordenanza reguladora do prezo público por prestación de servizos e utilización de instalacións culturais, educativas e análogas de titularidade municipal.)
Os documentos en soporte pergameo non se fotocopian.
Lingua:
Latin
Galician
Spanish; Castilian
Características físicas
Estado de conservación:
Bo
Descrición do estado de conservación:
Unha parte moi importante destes documentos están en soporte pergameo.
Documentación relacionada
Existencia e localización de orixinais
Localización de orixinais: Arquivo Histórico Nacional, Arquivo do Reino de Galicia e Real Academia Galega.
Existencia e localización de copias
Existencia de copias: No existen copias
Unidades de descrición relacionadas
Unidades de descrición relacionadas: No Arquivo Municipal: Expediente de nomeamento de Cronista a Andrés Martínez Salazar, 1889- 1915, c-996 (11) e Libro de actas de acordos municipais, sesión 05/11/1889, c- 121.
Notas
Nota xeral
(1) Sesións de 10 de novembro de 1943 e 5 de xaneiro de 1944. En: Libro de actas da Comisión de Instrución Pública, 1943-44, c- 2449 (4)
Xunta de Galicia. Información mantenida y publicada en internet por la Xunta de Galicia