Familia Magariños Rodríguez

Ligazón persistente

Este fondo familiar desenvólvese en torno á figura do escultor e fabricante de mobles compostelán Maximino Magariños Rodríguez (1869-1927). Fillo do tamén escultor Manuel Magariños Blanco e de Dolores Rodríguez de Bendaña. Despois de realizar estudos artísticos, traballar nos obradoiros de reputados artistas e abrir o seu propio, en principio na rúa do Franco e despois na rúa de San Pedro, casa con Josefa Fernández Liste, coa que tivo 16 fillos. Entre as súas obras máis representativas está a execución da capela das Reliquias da Catedral de Santiago, diversas intervencións en Santa María a Maior de Pontevedra e noutras institucións relixiosas, tanto do eido urbano como rural: O Carballiño, Parada, Monterroso, Cee, etc. Varios dos seus fillos, Baldomero, José e Ignacio, continuaron co obradoiro da Porta da Pena durante algún tempo. O seu xenro, Francisco Pérez Benítez, dedicouse a estudar a figura e obra de Maximino Magariños e a estudar e conservar o arquivo.

Documentación producida e acumulada durante a vida do escultor Maximino Magariños e a súa familia: nai, irmáns e descendentes. Ingresa no Arquivo en febreiro do ano 2016 por doazón de Jaime Magariños Sánchez.

A meirande parte deste fondo familiar acolle a documentación producida e recibida polo escultor, deseñador e fabricante de mobles Maximino Magariños Rodríguez, cunha pequena representación de documentación doutros membros da familia. O abano cronolóxico deste fondo vai de 1869 a 2013. As series máis representativas son a correspondencia e as notas, de tipo persoal e laboral, do devandito escultor. Esta documentación céntrase entre principios do século XX ate o 1927, ano do seu falecemento. Tamén é moi representativa a documentación xerada e recibida por Francisco Pérez Benítez, na súa función como estudoso da obra do seu sogro. Destaca a serie de correspondencia e a de recompilación de prensa relacionada con Magariños. Esta documentación está centrada nas décadas de 1990 e 2000. Cómpre resaltar, dentro da sección Coleccións, a series de fotografías e tarxetas postais. Na súa meirande parte reflicten obras de Magariños, tanto de escultura como mobles. A cronoloxía pode dividirse en dous grandes períodos: o primeiro desde finais do século XIX ate a década de 1940; o segundo, con fotografías realizadas ou recompiladas por Francisco Pérez Benítez de obras do seu sogro, data das décadas de 1990 e 2000.

A reprodución da documentación deste fondo está suxeita ás seguintes disposicións: - Decreto 219/2011, do 17 de novembro, polo que se fixan os prezos públicos e as normas dos servizos de reprodución prestados nos arquivos xestionados pola Xunta de Galicia. - Orde do 31 de agosto de 2010, pola que se establecen as normas para a consulta e reprodución dos documentos nos arquivos propios e xestionados pola Xunta de Galicia.