Carlos Martínez-Barbeito Morás naceu no ano 1913 na Coruña, no seo dunha coñecida familia da burguesía progresista e ilustrada. Membros relevantes dela foron o seu avó, Andrés Martínez Salazar; a súa nai, María Barbeito Cerviño; e o seu tío, Fernando Martínez Morás. Estudou Filosofía e Letras e Dereito en Santiago de Compostela e doutorouse en Dereito en Madrid. Faleceu na mesma cidade no ano 1998.
Dúas liñas sobresaen na súa biografía: A súa vocación intelectual, que o levou a cultivar durante toda a súa vida a literatura, a historia e o dereito, ademais de establecer contacto con algunhas das máis relevantes figuras intelectuais do seu tempo, tanto en Santiago de Compostela como en Madrid ou Barcelona, cidades nas que residiu en diferentes períodos; e a súa faceta de coleccionista, que o había mover a reunir importantísimas coleccións de carácter bibliográfico, cartográfico, iconográfico e museístico. Na súa infancia coñeceu e tratou o núcleo fundacional da Real Academia Galega. Sendo estudante en Santiago, formou parte, con García Sabell, Fernández del Riego, Carballo Calero, Cunqueiro e outros, do movemento xuvenil que arredor da FUE aspiraba a unha renovación cultural de Galicia. Foi daquela cando recibiu a visita de García Lorca, que causou unha grande impresión naqueles mozos. Máis tarde, en Madrid, a súa amizade con Lorca permitiulle convivir con outros importantes poetas do seu tempo: Juan Ramón Jiménez, Aleixandre, Cernuda, Altolaguirre, Dámaso Alonso, Gerardo Diego, Luis Rosales e José Luís Cano. Tamén tratou a Unamuno e tivo como profesores na universidade a Fernando de los Ríos, Américo Castro, Ortega y Gasset, Recasens, etc. En Barcelona, despois da Guerra Civil, formou parte do grupo de escritores cataláns aos que pertencían Carles Riba, Josep Pla, Segarra, Garcés, Soldevilla, Salvador Espriu e Díaz-Plaja. Tratou tamén a D´Ors. Da súa actividade profesional cómpre subliñar que foi profesor adxunto de Historia dos Descubrimentos e de Xeografía de América da Universidade de Madrid, ademais de director, durante doce anos, do Museo de América en Madrid. Ademais, desempeñou a xefatura de programas culturais e a de programas dramáticos en Televisión Española, así como a Asesoría Técnica da Linguaxe. Traballou tamén no NODO como xefe do departamento de estranxeiro. Pertenceu a diversas corporacións científicas, literarias e artísticas: así a Real Academia Galega, Real Academia de la Historia, Instituto de Cultura Hispánica, Real Academia de Bellas Artes Nuestra Señora del Rosario, Academia Gallega de Jurisprudencia y Legislación, Instituto "José Cornide" de Estudios Coruñeses, Academia Nacional de Bellas Artes da República Arxentina, etc. Pronunciou numerosas conferencias e discursos. As súas publicacións son tamén moi abundantes; entre elas destacan tanto os seus traballos de pura creación literaria (poesía, novela, …) como os de investigación nos campos da literatura, da historia ou do dereito.
Historia archivística
-
Alcance e conteúdo
Compoñen o fondo series de documentos directamente relacionados coas actividades desenvolvidas ao longo da súa vida polo doante: de carácter literario, científico, profesional, de función ou persoal. Podemos subliñar así as series de Correspondencia, que comprenden toda a súa vida, e nas que atopamos como correspondentes personalidades relevantes da intelectualidade galeguista ou membros da xeración do 27, como Otero Pedrayo, García Sabell, Fernández del Riego, entre os primeiros, e García Lorca ou Vicente Aleixandre, entre os segundos; e as series Traballos literarios ou Ensaios, algúns deles inéditos. Como é adoito nos arquivos doutros familiares seus, existen tamén carpetas de recortes de prensa relacionados coas actividades que sinalamos. Mención á parte merecen algúns testemuños da súa faceta de coleccionista. Constan así no fondo o que parecen ser orixinais ou copias manuscritas de obras ou fragmentos de obras de escritores relevantes e emblemáticos de Galicia. Tal é o caso do Divino Sainete, de Curros Enríquez, ou do o poema “Castellanos de Castilla”, de Rosalía de Castro.
Condiciones de acceso
Condiciones de reproducción
Condiciones de reproducción:
Os seus herdeiros legais conservan integramente a titularidade dos dereitos de propiedade intelectual dos seus traballos literarios e científicos, inéditos ou xa editados. Para a reprodución dos documentos do fondo rexe con carácter particular o necesario coñecemento e autorización dos herdeiros.
Lengua:
Spanish; Castilian
Documentación relacionada
Existencia y localización de copias
Existencia de copias: Non existen copias
Unidades de descripción relacionadas
Unidades de descripción relacionadas: Relaciónanse con este fondo outros de familiares seus, tamén custodiados no Arquivo do Reino de Galicia: Andrés Martínez Salazar, Fernando Martínez Morás e María Barbeito e Cerviño. Intimamente ligada co fondo áchase a Colección cartográfica Martínez-Barbeito, adquirida en 1990 pola Xunta de Galicia. No Arquivo Municipal da Coruña gárdase a Colección de gravados Martínez-Barbeito, adquirida no seu día polo concello desta cidade. Na Fundación Barrié de La Maza, tamén na Coruña, custódiase a biblioteca de tema galego reunida por Carlos Martínez-Barbeito durante a súa vida, adquirida pola dita fundación. Finalmente, na Biblioteca da Deputación da Coruña custódiase a súa biblioteca persoal, adquirida por este organismo provincial aos seus herdeiros.
Notas
Nota general
Historia Institucional/Biográfica tomada da Enciclopedia Gallega. Santiago: Silverio Cañadas, 1974-2000
Xunta de Galicia. Información mantenida y publicada en internet por la Xunta de Galicia