Xulgado de Primeira Instancia e Instrución nº 1 de Cambados

Ligazón persistente

Creado o Xulgado de 1ª Instancia polo Regulamento da Administración de Xustiza de 1835 e consolidado, con funcións de primeira instancia no civil e instrución no penal, pola Lei Adicional de 1882, o Xulgado de 1ª Instancia e Instrución de Cambados abarca nas súas competencias os municipios de Vilagarcía de Arousa, Vilanova de Arousa, O Grove, Meis, Ribadumia, Sanxenxo e Meaño. Pola Lei 12/1982, do 31 de marzo, créase o partido xudicial de Vilagarcía de Arousa, do que pasan a formar parte, segregándose do de Cambados, os concellos de Vilagarcía e Vilanova de Arousa. Así mesmo, a Lei 28/1988, de Demarcación e Planta Xudicial, crea o Xulgado de 1ª Instancia e Instrución nº 2 de Cambados, que absorberá os asuntos dos suprimidos Xulgados de Distrito de Cambados e Sanxenxo, pasando o máis antigo a numerarse co nº 1.

Debido á inauguración dunha nova sede xudicial, o Xulgado de 1ª Instancia e Instrución nº 1 solicitou o traslado ó A.H.P. dos expedientes de determinada antigüidade. En abril de 2003 tivo lugar o ingreso dos expedientes do Xulgado nº 1 nun local recentemente alugado e acondicionado pola Consellería de Cultura; estableceuse como data límite o ano 1990, co fin de liberar o máis posible o arquivo xudicial, e tendo en conta que é o ano no que deixan de funcionar os Xulgados de Distrito ( Cambados e Sanxenxo neste caso) e inicia a súa actividade o Xulgado de 1ª Instancia e Instrución nº 2.

A meirande parte da documentación está composta polos Xuízos civís en primeira instancia, e os Sumarios sobresidos, na orde penal, así como as dilixencias previas e preparatorias e mais as apelacións dos xulgados municipais e comarcais.

Acceso restrinxido de acordo co establecido polo artigo 57.1c), da Lei 16 /1985, do 25 de xuño, do Patrimonio Histórico Español.

Limítase a reprodución dos documentos que se atopen en mal estado de conservación ou non poidan ser obxecto de consulta segundo a normativa de acceso.

Unidades de descrición relacionadas: Pode atoparse documentación relacionada, en materia penal, no fondo da Audiencia Provincial.