Orfeón Unión Ourensana

Enlace persistente

Desde mediados do século XIX proliferan nas capitais provinciais españolas as sociedades constituídas con fins culturais e recreativos. Son espazos de socialización informais onde se debaten ideas e se relacionan os membros destas entidades. En 1887 promúlgase a primeira lei de asociacións e fúndase en Ourense o Orfeón Unión Orensana. Trátase dun conxunto coral integrado por afeccionados ao canto que se reunían nos faladoiros do Café da Unión Orensana, de onde toma o seu nome a nova entidade. Xorde con motivo do certame coral convocado para celebrar a inauguración da estatua do padre Feijoo, no que obtén o primeiro premio. O que comeza sendo unha formación musical, amplia posteriormente os seus obxectivos e acaba converténdose nunha sociedade artística cunha ampla oferta de actividades (grupo de teatro, comparsa de entroido, biblioteca, etc). Composto na súa orixe exclusivamente por homes, non permitiu a entrada de mulleres ata o ano 1928.